වැල් පාලමෙන් ගොඩ යනවාද නොඑසේනම් ගඟට පනිනවාද යන තීරණාත්මක තීන්දුව ජනතාව සතු බවයි ජනාධිපති අපේක්ෂක රනිල් වික්‍රමසිංහ කියන්නේ.
“එදා ඔය හැම කෙනාම දුක් වින්දා. පැය කීයක් පෝලිම්වල හිටිය ද; ගෑස් නැතුව කොච්චර කල් හිටිය ද; ත්‍රීවිල් එකට ඉන්ධන හොයාගන්න හිටිය ද. එහෙම අවස්ථාවක මම රට භාර ගත්තේ ඒක නැති කරන්න.
මට මේ සියලුදෙනා දුන්න සහයෝගය නිසා රට ගොඩගන්න පුළුවන් වුණා. අද අපි ආර්ථික ස්ථාවරභාවයට ගමන් කරනවා. සම්පූර්ණයෙන්ම එතනට ඇවිල්ලා නෑ. තව ඉදිරියට යන්න ඕනේ. අපි අනාගතය ගැන හිතලා වැඩ කරන්න ඕනේ. ඉතින් මේ දුර යනවා නම් අපි මේ ගිය මාර්ගයේ යන්න ඕනේ. අපි වැල් පාලම සම්බන්ධ වුණ මාර්ගයේ යන්න ඕනේ. එතනින් දැන් අයින් වෙන්න බෑ. ඒ අය කියන්නේ දැන් ඒ වැල් පාලම කපලා යන්න කියලා. වැල් පාලම කපලා ගියොත් අපි යන්නේ ගඟට.
මම බැලුවා ජනතා විමුක්ති පෙරමුණේ ප්‍රකාශය. අඩුම බිලියන 200ක් වත් ආදායම අඩු වෙනවා. ආදායම අඩු කරලා කොහොමද වියදම වැඩි කරන්නේ. ඒ ගණිතය දන්නේ නැතිනම්, ඒ ආර්ථිකය දන්නේ නැතිනම් මේ අය බලන්නේ වැල් පාලම එක පැත්තකින් කපන්න නෙමෙයි දෙපැත්තෙන්ම කපන්න. අපි මේ වැල් පාලම අතහරින්නේ නැතුවයි මේක කරන්නේ” යි එජාප නායක රනිල් වික්‍රමසිංහ පවසනවා.
