නව විධායක ජනාධිපතිවරයකු සමඟ ශ්‍රී ලංකාව අරඹන නව ගමනට හදවතින්ම සුබ පතන බව කථානායක මහින්ද යාපා අබේවර්ධන පවසනවා. සිය නිල ෆේස්බුක් ගිණුමේ සටහනක් තබමින් කථානායකවරයා මෙලෙස නව ජනාධිපතිවරයාට සිය සුබ පැතුම් එක්කර තිබුණා.
ලාංකීය පුරවැසියන් සිය මවුබිම අනාගත ලෝකය කරා ගෙනයාමේ නව නියමුවා ලෙස අනුර කුමාර දිසානායක මහතා තෝරාගත් බව මැතිවරණ කොමිසම විසින් නිල වශයෙන් සනාථ කර ඇති බවද කථානායක මහින්ද යාපා අබේවර්ධන එම සටහන මගින් දැනුම් දී තිබෙනවා.
මේ එම සටහන යි;
“සුභාශිංසනයයි
ලාංකීය පුරවැසියන් සිය මවුබිම අනාගත ලෝකය කරා ගෙනයාමේ නව නියමුවා ලෙස අනුර කුමාර දිසානායක මැතිතුමන් තෝරාගත් බව මැතිවරණ කොමිසම විසින් නිල වශයෙන් සනාථ කර තිබේ..
මෙරට නම වන විධායක ජනාධිපතිවරයා ලෙස අනුර කුමාර දිසානායක මැතිතුමන් ජයග්‍රහණය කිරීම රට පුරා මහජනයා විසින් සිය ජන්දය අතිශය සාමකාමීව භාවිතය මඟින් ඇති කළ වෙනසක් බව මගේ නිරීක්ෂණය යි.
කිසිඳු බරපතළ ගණයේ මැතිවරණ ප්‍රචණ්ඩ ක්‍රියාවකින් තොරව මෙවන් ප්‍රතිඵලයක් අත්පත් කරගැනීමේ ගෞරවය නිසැකවම ජය – පැරදුම එක ලෙස විඳින්නට තීරණය කළ අපගේ ජනාධිපති අපේක්ෂකයන් ගේ ජයක් මෙන්ම, මැතිවරණ කොමිසමේ, ත්‍රිවිධ හමුදා, පොලිසිය ප්‍රමුඛ ආරක්ෂක අංශයේ මෙන්ම දැනුවත් පුරවැසියාගේද ප්‍රජාතන්ත්‍රවාදයේ ද සැබෑ ජයග්‍රහණයකි.
අනුර කුමාර දිසානායක මැතිතුමන් කෙරෙහි ඇති වූ මේ මහජන විශ්වාසය එක රැයින් පහළ වූවක් නොව පාර්ලිමේන්තු ප්‍රජාතන්ත්‍රවාදයේ දීර්ඝ කලක් නියුක්ත වීමේ ප්‍රතිඵලයක් බවද මෙහිදී පෙන්වා දිය යුතුය.
වර්තමානයේ ඔහු ඉදිරියේ ඇත්තේ පහසු අභියෝගයක් නොවේ.
අපගේ සමාජ, ආර්ථික,දේශපාලනික දේහයේ විචල්‍යතා මැනවින් හඳුනාගන්නා අතරෙහි ගෝලීය භූ දේශපාලනික ප්‍රවණතා අතර නොගැටෙමින් හෙතෙම මේ දීර්ඝ ගමන තිරසාරව යා යුතුය.
ඒ සඳහා ප්‍රමාණවත් දේශපාලන අධ්ෂ්ඨානය ඔහු සතු බව මගේ විශ්වාසයයි.
නව විධායක ජනාධිපතිවරයකු සමඟ ශ්‍රී ලංකාව මේ අරඹන නව ගමනට හදවතින්ම සුබ පතමි.
මහින්ද යාපා අබේවර්ධන,
කථානායක,
ශ්‍රී ලංකා පාර්ලිමේන්තුව”
